Comezan os titoriais presenciais ás tendas adheridas a ‘MerCamariñas’, a central de venda online para o comercio local 09/04/2021

Comezan os titoriais presenciais ás tendas adheridas a ‘MerCamariñas’, a central de venda online para o comercio local

Os responsables da empresa local WP Nordés, encargada de xestionar o proxecto, están a visitar os establecementos para ofrecer unha formación personalizada sobre a plataforma.
A próxima semana a concelleira de Comercio, Lara Pasantes, reunirase cunha empresa de transportes que ofertará un convenio de colaboración aos establecementos para realizar os envíos.
Lara Pasantes explicou que “neste mes de abril está previsto que se faga pública a web para que os comercios poidan comezar a realizar as súas vendas na rede”.

O Concello de Camariñas comezou esta semana a levar a cabo os titoriais presenciais ás tendas e empresas adheridas a ‘MerCamariñas’, a central de venta en liña que nace co obxectivo de adaptar aos vendedores e vendedoras ao comercio electrónico para que poidan vender os seus produtos a través de Internet.

Os responsables da empresa local WP Nordés, encargada de xestionar o proxecto, están a visitar os establecementos participantes para ofrecer unha formación personalizada sobre o uso da plataforma. Unha das primeiras en recibir esta clase foi María Jesús, responsable da tenda de moda e complementos "O Rincón de Chus" que tivo a ocasión de aprender a subir os seus produtos ao novo espazo virtual do comercio camariñán.

Por outra banda, a próxima semana terá lugar unha reunión entre a concelleira de Comercio Lara Pasantes, os responsables da plataforma, e unha importante empresa de transportes que vai a ofrecerlles aos establecementos participantes un convenio de colaboración para realizar os envíos.

Lara Pasantes explicou que “neste mes de abril temos previsto que se faga pública a web para que os comercios poidan comezar a realizar as súas vendas na rede” e lembrou que “todos os que non puideron adherirse a MerCamariñas poden facelo agora xa que está aberta a terceira rolda”.