Renovación dos elementos de carpintería da Casa de Pedra e unha app de realidade aumentada sobre os naufraxios, traballos do obradoiro de emprego 21/01/2021

Renovación dos elementos de carpintería da Casa de Pedra e unha app de realidade aumentada sobre os naufraxios, traballos do obradoiro de emprego

Na especialidade de carpintería tamén executarán as obras na fachada de madeira da Biblioteca Municipal, actuación prevista para máis adiante.

O alumnado do programa de emprego ‘Xuventude polo Emprego’ promovido polo Concello de Camariñas xunto aos de Vimianzo e Muxía xa está a traballar a reo. Por unha banda, no módulo de ‘Instalación de elementos de carpintería’ están a efectuar a renovación dos elementos de carpintería da Casa de Pedra e no de ‘Desenvolvemento de Aplicacións con Tecnoloxía Web’ encárganse de crear unha app móbil de realidade aumentada.

Por unha banda, os alumnos e alumnas da especialidade de carpintería están a traballar na Casa de Pedra, arraxando o chan e vernizando, acabando dous despachos e tamén instalando varios estantes novos. Cando rematen con esta actuación iniciarán obras na fachada de madeira da Biblioteca Municipal.

Polo outro, a directora do programa e monitora da especialidade “Desenvolvemento de Aplicacións con Tecnoloxía Web” reuniuse co persoal da Axencia de Desenvolvemento Local do Concello de Camariñas para deseñar a aplicación móbil de realidade aumentada baseada na páxina web www.rutadelosnaufragios.com. Este traballo permitirá volver a facer visibles nos teléfonos móbiles os 62 barcos que forman parte da ruta, entre eles o Serpent e substituirá a ‘Layar’, antiga app de realidade aumentada que deixou de estar activa tanto para Android como para a plataforma de Apple.