O Concello inicia unha campaña de Nadal para incentivar o consumo no comercio e hostalaría de Camariñas 30/11/2020

O Concello inicia unha campaña de Nadal para incentivar o consumo no comercio e hostalaría de Camariñas

Aqueles negocios interesados en adherirse deben enviar un correo electrónico a mercacamarinas@gmail.com ou responder á comunicación enviada pola concelleira de Comercio, Lara Pasantes, a través de Whatsapp.

Está previsto que se inicie o 14 de decembro e remate o 4 de xaneiro.
Tomaranse imaxes ou vídeos aos produtos que decidan os establecementos adheridos para promocionalos nas redes sociais municipais.
A través da campaña ‘‘Merca en Camariñas, consume no teu Concello’’, o Concello de Camariñas está a preparar unha acción de dinamización do Nadal para incentivar o consumo no comercio e a hostalaría local valéndose das redes sociais municipais.

O obxectivo é dar visibilidade ao tecido comercial e hostaleiro local para apoialos ante as consecuencias da COVID-19 e incentivar as compras da cidadanía. Está previsto que a campaña comece o 14 de decembro e remate o 4 de xaneiro, para fomentar así as compras do Nadal.

Para levar a cabo esta iniciativa tomaríanse fotos e vídeos dos produtos estrela que quere promocionar cada comerciante ou hostaleiro. Por exemplo: as centolas dunha peixería, o bolso dunha tenda de roupa, o xamón do ultramarinos… Logo, difundiríanse estes produtos a través das redes sociais do Concello de Camariñas (Facebook, Twitter e Instagram) indicando o comercio e o seu contacto (sen prezos).

Participación

A adhesión á campaña por parte de comerciantes e hostaleiros é totalmente gratuíta. Aqueles interesados ou interesadas en participar deben responder á comunicación enviada pola concelleira de Comercio, Lara Pasantes, a través do Whatsapp ou se o prefiren enviar un correo electrónico a mercacamarinas@gmail.com indicando nome e apelidos, nome do comercio ou local hostaleiro, e un teléfono de contacto.

Despois desde o Concello poñeranse en contacto para concretar a data e a hora para facer a sesión de fotos.