O Concello sinala a prohibición de amontoar pedras formando milladoiros nos seus espazos naturais 07/09/2020

O Concello sinala a prohibición de amontoar pedras formando milladoiros nos seus espazos naturais

Instaláronse carteis advertindo aos visitantes das posibles sancións que pode supoñer esta practica, con multas de ata 6.000 euros.
Esta medida foi unha das conclusións adoptadas polo campo de traballo levado a cabo no verán.

O Concello de Camariñas decidiu iniciar unha loita decidida contra a costume de moitos visitantes de amontoar pedras formando milladoiros nos seus espazos naturais. Para iso, instalou carteis no Cemiterio dos Ingleses que sinalan a prohibición de esta práctica, que pode supoñer sancións de ata 6.000 euros.

Os chamados milladoiros son perxudiciais tanto para a flora como para a fauna da zona na que se crean e ademais alteran a paisaxe. Deixan o chan descuberto, exposto ao sol e ás choivas; desprotexen a vexetación litoral do vento e a salinidade; modifican o hábitat da fauna endémica xa que estas pedras crean condicións especiais de temperatura e humidade; alteran o equilibrio ecolóxico dos hábitats litorais de interese comunitario; e deixan unha profunda alteración na paisaxe xa que, por exemplo, as praias de cantos rodados e espazos xeomorfolóxicos de Camariñas formáronse fai 8.200 anos durante unha breve subida do mar polo que é unha parte importante do patrimonio científico e natural.

O obxectivo desta medida é que os visitantes non deixen a súa pegada nos espazos naturais xa que “todos temos dereito a coñecelo tal e como é”, explica a alcaldesa de Camariñas, Sandra Insua.

Esta medida foi unha das conclusións adoptadas polo campo de traballo de voluntariado levado a cabo no verán. Outra das súas decisións foi que os carteis estivesen castelán xa que ‘prohibido amorear pedras’ podería non ser entendido por todos os visitantes, obxectivo desta campaña.