O Concello

Departamentos

* Os alcaldes e alcaldesas analizaron as 60 accións incluídas no Plan de Reactivación Económica da Costa da Morte 12/05/2020

Os alcaldes e alcaldesas analizaron as 60 accións incluídas no Plan de Reactivación Económica da Costa da Morte

  • Na reunión, que tivo lugar hoxe en Vimianzo, participaron tanto os rexedores como os ADL dos 14 concellos que se uniron para elaborar este documento.
  • Entre as propostas que máis interese suscitaron estivo a creación dunha plataforma de venda online e a domicilio para as empresas locais.  

Os alcaldes e alcaldesas dos 14 concellos da comarca que se uniron para elaborar o Plan de Reactivación Económica da Costa da Morte reuníronse hoxe en Vimianzo para analizar as conclusións do documento encargado aos Axentes de Desenvolvemento Local (ADL) e no que se recollen un total de 60 accións.  

Nesta reunión participaron de forma presencial a alcaldesa de Vimianzo, Mónica Rodríguez; a alcaldesa de Cee, Margarita Lamela; o alcalde de Ponteceso, Lois García Carballido; o alcalde de Malpica, Walter Pardo, e a alcaldesa de Camariñas, Sandra Insua. Debido á limitación de aforo establecida para a Fase 1 da desescalada o resto de rexedores (Carnota, Mazaricos, Corcubión, Fisterra, Muxía, Dumbría, Laxe, Cabana de Bergantiños e Zas) sumáronse a través de videoconferencia.  

A ADL de Camariñas, María Jiménez; a ADL vimiancesa, Rosa Sánchez, e o seu hómologo de Cee, Juan Carlos Santabaya, foron os encargados de expoñerlle aos rexedores os pormenores do plan. Unha folla de ruta que pretende facilitar a toma de decisións das alcaldías dentro das súas competencias e que pretende minimizar os efectos negativos da pandemia, acurtar o prazo de recuperación, consolidar a sustentabilidade social, económica e medioambiental do territorio, reforzar a identidade territorial e colaborar cos diferentes grupos de interese da comarca.  

Cada unha das 60 propostas está enmarcada dentro duns eixos estratéxicos específicos (talento, gobernanza, reactivación económica, consumo e comercio de proximidade ou valorización do rural) a través dos que se acadarían obxectivos diferentes.    

O obxectivo deste encontro era o de poñer en común o documento para, entre todos, rematar de perfilalo ao engadir, modificar ou desbotar algunha das liñas. “Por dicilo dalgún xeito, é un plan vivo que se presenta como un menú á carta onde agora cada alcalde ou alcaldesa pode escoller as accións que máis lle conveñan polas características do seu territorio e decidir se algunha a aplica de xeito individual no seu Concello e outras as propón de forma conxunta con máis administracións”, explicaron desde o comité de traballo dos ADL.  

A alcaldesa de Camariñas, Sandra Insua, remarcou que “este Plan demostra que os concellos da comarca podemos traballar unidos na busca dun obxectivo común, que neste caso é o de minimizar o máximo posible os efectos desta crise sanitaria na economía dos nosos veciños e veciñas”.  

Ademais, Sandra Insua explicou que “pola nosa parte esta semana vamos a ter unha xuntanza co tecido empresarial de Camariñas na que lles presentaremos o plan e as actuacións que pensamos máis válidas para o noso Concello, escoitando tamén as súas propostas para coordinar así o desenvolvemento dun plan conxunto”.  

Liñas principais  

Houbo varias propostas que se desenvolveron dun xeito máis profundo por parte do comité de traballo, principalmente por dous motivos: por ser unha mostra representativa do conxunto de accións do plan e para amosar o nivel de detalle que adquirirían as propostas que se leven a cabo. Foron:   
  • Creación dunha plataforma de venda online e a domicilio para as empresas locais.
  • Axudas directas ao tecido empresarial local afectado pola COVID-19.
  • Posta en valor do monte de propiedade municipal.
  • Mesa de concertación: mellora dos procedementos administrativos locais para empresas.
  • Rede de mercados e mercadillos Costa da Morte.
  • Lonxa agropecuaria da Costa da Morte.


© by Abertal