Camariñas reparte pantallas de protección entre o comercio local 04/05/2020

Camariñas reparte pantallas de protección entre o comercio local

Foron doadas polo IES Monte Neme e tamén polo Dúo Defesta.
A entrega comezou polas perruquerías, centros de estética e ultramarinos e chegará a todo o comercio local e á hostalaría.

O Concello de Camariñas está preparando a volta ao traballo e a apertura ao público, con cita previa, que moitos sectores teñen prevista para este luns, 4 de maio, cando se iniciará a Fase 0 do plan de desescalada. Para iso, comezou esta fin de semana a repartir pantallas de protección facial entre o comercio local.

O reparto comezou polas perruquerías, os centros de estética e os ultramarinos pero nos próximos días chegará a todo o comercio local e tamén á hostalaría. O obxectivo é incrementar as medidas de protección para, xunto coas medidas de hixiene, poder atender dun xeito seguro á súa clientela.

Estas pantallas faciais foron doadas ao Concello polo IES Monte Neme de Carballo, onde é docente o camariñán Diego Carril, e tamén polo Dúo Defesta, de Laxe.

A alcaldesa, Sandra Insua, agradeceu o xesto “que permitirá que todos os negocios de Camariñas poidan afrontar a primeira fase da desescalada con outro elemento de protección como son as pantallas faciais, aumentando así a seguridade na atención ao público”.