FITUR acollerá a presentación da XXIX Mostra do Encaixe de Camariñas 22/01/2019

FITUR acollerá a presentación da XXIX Mostra do Encaixe de Camariñas

· Sandra Insua dará a coñecer o cartel e o vídeo promocional desta edición.

A Feira Internacional de Turismo (FITUR) que se celebra desde mañá, mércores 23, ata o domingo 27 de xaneiro no Parque Ferial Juan Carlos I de Madrid é o lugar elixido para presentar oficialmente a XXIX Mostra do Encaixe de Camariñas.

A presentación deste evento recoñecido internacionalmente no mundo da moda terá lugar o mércores, 23 de xaneiro, ás 11 horas dentro do espazo que TourGalicia lle cede á Costa da Morte a través da CMAT (Asociación de Turismo da Costa da Morte).

Nese momento a alcaldesa de Camariñas, Sandra Insua, dará a coñecer o cartel oficial e o vídeo promocional desta edición. A primeira edil estará acompañada do concelleiro da Mostra, Sergio Caamaño, e da directora do Museo do Encaixe, Dolores Lema.